कविता
तिम्रो याद आउँदैन !
तिम्रो याद आउँदैन !
म यात्रामा भएको बेला तिम्रो याद आउँदैन ।
किनकि, म भेट्छु–
बहिनी जस्ता पुष्प वृक्ष,
छोरी जस्ता सुनगाभा,
आमा जस्ता बुट्यान,
बुवा जस्ता रुख,
उदास हजुरआमा जस्तो खोला, र
उदार हजुरबा जस्तो माटो ।
म किताब पढेको बेला तिम्रो याद आउँदैन ।
किनकि, किताबले लैजान्छ मलाई–
म नगएको ठाउँ,
म नभएको बस्ती,
किताबले देखाइदिन्छ–
मैले नदेखेको उज्यालो ।
तिमी र मैले आजसम्मै गर्न नसकेको रमाइलो
म किताबसँग गर्छु ।
म काममा भएका वेला पनि तिम्रो याद आउँदैन ।
किनकि, मरो भविष्यमा– म तिम्रो भविष्य देख्छु,
मरो मेहनतमा– बुवाको पसिना,
मेरो कमाइमा– आमाको आशा, र
मेरो उन्नतिमा हाम्रा सन्ततिको उज्यालो ।
यात्रा, अध्ययन र काम बाहेक अरू केही मन पर्दैन मलाई ।
तिमीलाई पनि त–
खाली खल्ती
रित्तो झोला, र
भरिएको दिमाग भएको यो मान्छे ।
कहिले पो मन पर्या‘थ्यो र ?
टिप्पणी लेख्नुहोस्